Сяргей Грыневіч: “Цікава была перапрацаваць супергерояў у нешта больш трапнае”

Сакавік у календары mam стаў чарговай нагодай завітаць у майстэрню да Сяргея Грыневіча ў вёсачку Славічы, што туліцца да Нёмана ў 18 кіламетрах ад Гродна. Паразмаўлялі пра гульню вербальных і невербальных сэнсаў, іронію і гумар, якія бароняць розум ад шэрага. Наведалі дом, што стаіць на высокім беразе Нёмана. “Бацькі Нёмана”, – падкрэслівае мастак.

– Гэта маё месца сілы, але галоўнае не сам дом, а лакацыя. Лічу яе за вялікі здабытак. Дняпро, і Дзвіна могуць паспрачацца за тытул “бацька”, але ж бацька Нёман – толькі адзіны. Кожны дзень гляджу на яго. Рака ў любую пару года цудоўна выглядае.

Чаму сакавік? “Адліга на Нёмане” намалявана ў сакавіку. Вясна – ажывае прырода, і можна назіраць яшчэ рэшткі зімняга надвор’я.

– Цені больш высокія, кантрасныя, бо зімой у нас такога сонца няма. Часцей вось, як сёння. Дзень прайшоў, але ж не развіднела. Шэрасць, нават, калі паўднёвы бок. Супермен прызямліўся на бераг Нёмана каля майго дома. Я яго не аднойчы, яшчэ некалькі разоў тут прызямліў. Ёсць праца з адлігай на чырвоным Нёмане. У прыватнай калекцыі знаходзіцца. “Канцэрт у стадоле” з Бэтманам (другая старонка календара) – гэта таксама рэальнае месца і сапраўдны канцэрт.

– Хацелася паіранізаваць з гэтых персанажаў, перанесці іх у сучасныя абставіны і традыцыйнае беларускае наваколле. Апынуўшыся ў нязвыклым асяроддзі, уся драматургія набывае нечаканы сэнс, і візуальны шэраг таксама выклікае нязвыклую трактоўку.

Гэтая тэма пакуль што не стала сапраўднай серыяй, карацей, яна працягваецца цягам часу. Героі апранаюць маскі, альбо заўсёды ў масках, каб стаць/ застацца такімі, якімі хочуць/мусяць, альбо вымушаны быць.

– Ёсць нейкія папулярныя персанажы, поп зоркі, таксама ў цябе ёсць іронія, сцёб. Напрыклад, быў вялікі скандал з Кейт Мос з наркатой. Усе гэта абгаворвалі, была варта маляваць з іроніяй. Намаляваў партрэт у Швейцарыі. Зараз ён у кватэры ў горадзе вісіць, і да гэтага яшчэ трэба прыстасавацца.

У ванны Клеапатры мастак акунуў Элізабэт Тэйлар таксама невыпадкова, бо акторка ў маладосці згуляла галоўную ролю ў фільме “Клеапатра”: “Канешне, трэба была яе туды акунуць”.

Вось больш складаны прыклад, гульня візуальных і вербальных сэнсаў з Альбертам Энштэйнам. Знакамітае фота Энштэйна з высалупнутым языком – асацыяцыя з групай Ролінг Стоўнз (камяні коцяцца) і прозвішча Энштэйн (ад нямецкага Stein (Штэйн) – камень): “Два каменя, два языка. Тут усё адно пра адно”.

Дарэчы, можна проста смешна паслізнуцца і “адкінуць канькі”, ці заглядзецца на жаночы стан у фітнес-клубе.

– Пачуцце гумару адзінае, што мяне ратуе, я яго вельмі цаню. Цяпер хочацца зрабіць нейкае выказванне, але няма ніякіх магчымасцей. Стараюся не паддавацца такім раскладам, маляваць тое, што хочацца, і час ад часу нешта малюю “ў стол” з непераадольнай надзеяй, што надыдзе час, і вернецца адваротная рэакцыя ад гледача. Непасрэдны кантакт з гледачом для мяне вельмі істотны.

У майстэрні каля сцяны прысунуты два вялікія, пакуль што, белыя палотны. “Белае палатно – самае прыгожае, цікавей, чым нешта”, – лічыць мастак. Але ў гэтым выпадку ўсё ясна – у будучыні тут будуць апосталы Петр і Павел для касцёла Архангела Міхаіла ў Навагрудку.

– Калі накатвае цяжкая дэпрэсія, хочацца маляваць. Ратуюць праца і камунікацыя. На жаль яна сёння больш ідзе ў анлайн фармаце, але ў любым выпадку ратуе. І вось такая дылема: маляваць тое, што хочаш – немагчыма. Нават за мяжой, запрашэнні на выставы прыходзяць, можна, але нешта нейтральнае. Салон, адным словам.

Жыццё ў весцы таксама добры паратунак для мастака: "Зімой печку растапіць люблю, камін – гэта не цяжка. Адно задавальненне. Летам – траву пакасіць, зрабіць нешта карыснае, і атрымаеш маральнае задавальненне ад жыцця. Мне ў гэтым сэнсе лепей. Калі няма ідэй, каб нешта стварыць, заўсёды фізічная праца дапамагае. Альбо Раберціка малюю (унука)", – усміхаецца.

Больш пра Сяргея Грыневіча можна даведацца тут (opens new window)

КАЛЯНДАР MAMGRODNO 2025

СЯРГЕЙ ГРЫНЕВІЧ. САКАВІК

Сакавік (март). Сяргей Грыневіч. Адліга на Нёмане

Сяргей Грыневіч. "Канцэрт у стадоле"

Сакавік. Нататкі.

Увесь каляндар глядзець тут (opens new window)

Аўтар: Іна Максімчык, фота: Іна Максімчык і з архіва Сяргея Грыневіча